eggie eggie擺檔點滴

今日是eggie eggie第二日開工,有個好開始,因為尋晚十二點就有得去訓覺。
不過尋晚臨訓之前先記得要check stall no.,睇完即刻有啲訓唔著,事關我地上個星期係F26(F代表food area),但今次去左A,好奇怪,點解我地寧寧捨捨係第二度既呢?
今朝又是五點鬧鐘響馬上彈起身,搞掂晒啲雞蛋仔漿就去拎租車。
原先係租返上次個架,前兩日先通知我地架車要入廠維修(一早應該要喇,舊到咁 :p),好彩租得切第二架。
aiyaaaaaa,個天對我好少少得唔得啊?架車撻著左行左兩步engine就自動熄左,嚇L死人,好彩試左幾次架車又郁得姐。
今次未夠八點就去到,可以放心晒。停低架車即刻衝左去問點解我地會係A而唔係F,佢話我地今次個位對住條街,除左可以做行market既人既生意,仲有機會有啲就咁經過既人會幫襯我地,聽落好似幾好咁喎。
好順利咁泊低架車再返去幫手開檔,今次泊得唔錯吧hohoho(見下圖,我在右邊)。
img_6662

九點幾就有第一個小客人,就係對面賣silk eye mask個檔主既女,佢試食左一粒雞蛋仔就好乖咁帶埋媽媽過黎買(奸計得逞hehe)。媽媽見到係甜野,問佢:「do you want this for breakfast, or may be in the afternoon?」,小妹妹好可愛好靦腆咁點點頭,之後佢超開心咁拎住我地杯雞蛋仔雪糕做早餐,食到lam lam脷。

十點半我們的朋友帶埋媽媽來撐場,一人拎住一杯,係度傾下計,姨姨都話:「真係幾好食喎。」嗱,我地唔係得個樣架,雞蛋仔好好食架。唔知係咪因為咁,來買的人一浪接一浪,十一點零已經賣左上個星期成日既數目,亦都可能關位置事既。

看來我們的eggie eggie都係受小朋友歡迎啲,因為我好深刻既都係小朋友居多。有個韓國妹妹,我好好好記得,佢上個星期黎買過,當時佢俾左$9.95我,同佢講仲爭五仙,不過因為言語不通,我地就就咁收左佢$9.95。估唔到,真係估唔到,今個禮拜見到佢﹗﹗﹗好滾動啊,我們的第一個回頭客是個小妹妹,我會記住的。希望黎食過的人都會記得我們,會再回來。

跟住係一對姊弟,佢地同爸爸媽媽黎食野,岩岩行入個market就見到我地個檔,試食左都大讚好好味,簡直係見到佢地雙眼發光(一點都沒誇張喔),佢地話食完lunch出返黎買當飯後甜品。過左好耐,以為佢地唔會返黎,點知就見到個小男孩同佢阿爸,心諗yesssssss﹗點知佢地企左好耐,應該係等埋家姐同阿媽,轉過頭發覺佢地已經消失左,已經同鍾小薯講ohhhhhhhhh…不過佢地最終又出現返,我地偷聽到原來個阿爸話個仔食唔晒個lunch宜家又走黎話要食dessert,that’s the problem,不過天下邊有父母唔錫自己仔女架,佢地緊係買左喇hehe。拎到之後仲話oh my god,勁興奮咁影相。見到佢地咁樣,頓時有種咁辛苦都係值得的感覺。

有個講廣東話既家庭,仔仔試食左之後鍾意食,爸爸媽媽就買左一底淨雞蛋仔走雪糕走toppings既俾佢食。我真係好多謝每個黎買我地eggie eggie既講廣東話既人,係香港地,雞蛋仔唔係一樣貴野,但係澳洲,我地做唔到香港既價錢,我地賣$8,甚至$10,兌返港紙係好L貴。講開又講,記得有個ABC女仔,應該都係香港background,試食左之後就買左一底。我仲偷聽到佢同佢朋友話要返香港,haha好開心佢可以係呢度揾到香港的味道,亦都好開心我地整到香港的味道。

一日下來,生意比上星期好,但計完條數,仲未為到本。下個星期加加油,我相信好東西會有人欣賞的。在此衷心銘謝鍾小薯陪我追夢,當初就因為我說過想賣雞蛋仔,就跟我說可以,和我一起準備很多很多東西,給了很多很多意見,現在還和我一起每個星期六晨咁早5點起身,做足一日。

Chur左成日,緊係要去Chur burger食個漢堡包先喇,正。

img_6689

明天要上班努力賺錢,晚安喇。

chiara-sign

 

Advertisements

1月14日 賣雞蛋仔有感

今天可以算是個大日子,籌備良久的雞蛋仔生意終於要開始了。
因為太鐘意食雞蛋仔,所以想賣雞蛋仔,諗住有得做啵。
從選購雞蛋仔機和其他工具;到鑽研食譜;試了又試,整了又整,食完再食(到宜家我已經唔想再食了haha);中間怠慢了好一陣子,因為找場地找得有點沮喪,重新出發後買裝飾,到各個細節都希望做到最好(我知係行左少少既,但又真係事實喎)。
這個星期一直最後衝刺,四周出沒尋寶,到前幾日再整下啲雞蛋仔,大檸樂喇。
因為一路以來只係用死一部機,另一部擺埋一邊完全冇掂過,臨開檔先驚覺部機好似靚耳筒要煲下啲聲先會靚咁,要用得多先會整到靚仔既雞蛋仔出黎。
完 全 冇 諗 過 會 係 咁,兩日狂整了快要一百底雞蛋仔(好似誇張左少少,但應該都有五六十底),終於見到啲曙光。
尋晚準備到凌晨三點多才彈去訓,今朝五點鬧鐘響即刻彈起身,再整今日要準備要賣光光的90底雞蛋仔漿,再去拎租返黎既貨車,再搬晒成間屋出去(由canopy,到雞蛋仔機,風扇2大把,blah blah blah…下刪雜項數百樣),途中仲要遇到好多「難題」。
1. 因為現實問題,我要揸住部hi-ace貨車,鍾小薯要揸返自己架車,一開車就講左一連串嚇死,見到油箱箭嘴below empty,心諗我已經唔熟澳洲啲路架喇,都係諗住安全無恙咁車啲野去個market姐,咁玩野啊大佬。去左幾個油站都冇LGP喎仲要﹗好彩同車主溝通後發現原來個標版是壞的,純屬虛驚一場。
2. 因為搬晒幾千樣野上車用左超級耐,加上周圍揾油入既關係,我地去到個market個陣,人人已經set up緊,我地遲到就黎連個檔都冇埋(如果8:30都no show,個位就會俾左後備名單既人,好彩8:15去到)。但亦因為遲左,要我自己揸住架大牛龜去泊車,千辛萬苦揾到地方泊車,但我泊到一pat屎咁。扭極條駄都唔對路,仲愈扭愈埋隔離架車度,最後就咁(下圖)停低左架車9衝返個market度幫手set up。
img_6509
3. 個Market其實呢就十點正式開始,但九點幾已經開始有人行黎行去,負責整雞蛋仔既鍾小薯發覺整唔到雞蛋仔﹗好大鑊﹗用晒新舊兩部機,試左幾底都冇一底係成功既,係佢超級緊急,而我簡直就想喊係個陣,我仲要懶冷靜咁一邊安慰鍾小薯,一邊抹下部機搽下啲油,希望奇蹟出現。
4. 好喇,整到靚仔既雞蛋仔喇,但一個幫襯既人都冇,拍烏蠅左成個鐘。終於係十一點賣左我地第一底雞蛋仔,yeahhhhh係講廣東話既一對情侶,不過佢地話自己唔係香港人喎haha。賣出左第一底雞蛋仔叫做鬆左一口氣,亦都成功賣左我地既自制凍檸茶。

講完啲諗起都覺得好似坐緊過山車既野,就講下啲好野先。
1. 我同鐘小薯其實都好滿意我地個檔既擺設,係我地想要既感覺,有種小清新。
2. 到下午有兩底都整得唔成功,諗住再整過俾個客人,不過可愛的客人並沒有介意,照單全收,好滾動啊啊啊。
3. 有啲未見過唔知雞蛋仔係乜東東既人來幫襯我地,覺得有點達到了當初想將雞蛋仔介紹俾澳洲鬼佬既意念,亦都有人係掛住雞蛋仔既味道,來我們這裡尋找。
4. 最後其實我地倆個都偷偷留意到,經過我地個檔見到我地product相,都會嘴角上揚,雖然冇買,但都幾有滿足感既。

今天是漫長的一日,總算開左第一次檔,咁係有啲甩漏既,希望下個星期會更好。
不過總算真真正正體會到賺錢有幾咁辛苦,真係好L攰。訓喇,早抖(已起身17小時)。
img_6517

Sweet dream,
chiara sign

突然又已一年 從2016到2017

時光飛逝,眨眼又到2017年。
2016年,有大半時間都在澳洲,來working holiday也過了一半。
工作也就這樣吧,能糊口就好,老實說反正我也沒事業心,呵呵。
當初帶著很多未知來到了雪梨,短短半年已經做過四份工(其實我都唔想成日轉工架大佬)。
第一份工待遇不錯,又近屋企,車錢都慳返。
揾到既錢夠交租食飯囉,仲買左我人生第一部真正屬於自己既電腦,自問都幾叻女架喇。
九月到十一月中都幾可憐,份工唔係好穩定,即係收入唔係好穩定,真係頭都痕埋。
不過之後因為周圍都請Christmas casuals,幸運地揾到份日日都有工開既工。
於是,我的第三份工就係Dan Murphy’s既call centre做customer service,係喇,即係成日俾人鬧個啲,狗屎垃圾明明唔關自己事都要熬鬧,係咁sa冧,不過好搞笑,有時啲人會話:「我知唔關你事。」跟著繼續鬧。
不過一路俾人鬧,都一路學到幾多野既。
最好笑既應該是我宜家知道Tooheys係澳洲啤酒囉, 本身已經好少飲酒,又唔係係澳洲大既我,鬼識Tooheys咩。叫你串黎聽下姐,唔使鬧人既。
現在識多左好多酒(不過依然很少飲酒喔),紅白烈啤酒都識少少咁囉,覺得自己既知識又增長左。
第二樣學到既野,就係識多左好多澳洲既suburb,遠至WA和SA,跟住QLD,到比較近既VIC和NSW,以前一丁點兒概念都冇,聽得多好似好熟悉咁。
第三應該就係聽野既能力大大提升左,以前每次考listening都考得幾好,諗住自己listening好勁喇(點解可以咁唔知醜),但原來真係好唔同,有時真係佢講完一大輛都唔知佢up緊乜9。
講英文都好似大膽左咁,是但喇,我又冇係外國讀過書,講英文係有香港accent架喇。難聽係難聽左少少既,但其實自己接受左,也就好了。
因為十二月可以算是最忙碌的季節,各大商人都係靠住呢個時間賺錢的,於是有幸地得到我第四份工— 超市收銀員。
星期日返工真係好爽,因為會有1.5倍工資,係香港,加班已是平常事,週末上班係唔會有得補水的。

工作以外,最大進步應該是廚藝吧(沾沾緊)。
日日煮飯,雖然只是家常便飯,係人都整到。
偶爾還是會搞場大龍凰,整下香港有呢度冇既莎莉蛋糕,整下久不久就會心思思想食既芒果糯米飯,整下止香港飲茶癮的糯米雞,整下蛋撻,整下roasted beef,最新傑作是今晚既葡國雞。
剛剛先過左既聖誕節,過得好似只有在電影裏才看到那樣的,在外國,這大概是正常的吧。
鄉下妹的我卻覺得好夢幻,屋企的一角坐著一大棵聖誕樹,晚餐是烤雞啊,羊架啊等等,又是紅酒白酒的。
如果可以,想找個聖誕讓全家都來過節。

在這裡,試了很多自己發夢都冇諗過會做的事,也算是踏出了自己的comfort zone吧。
2017年,希望可以做回自己熟悉的事,讓四年學習得來的沒有白費。
2017年,希望可以養回做運動的習慣,十分想念那個天天精力充沛的自己。(hash tag去掉肉肉)
2017年,希望家人朋友個個身體健康,有空來找我玩喔。

Missing everyone,

chiara-sign

2016上半場完 下半場會更精彩

2016就這樣過了一大半,六個月裏返左三個半月工,玩左個半月,廢青左近一個月,算係咁啦(嗱我有做野有俾家用架hehe)。 原來,不經不覺已經畢業了一年,怎麼上學的日子彷彿只是昨日,但又怎麼好像工作了好久。

畢業後,幸運地成為了編輯小隊其中一員,過了大半年的輪班生活。
現在回想起,頓覺世事無絕對,因為經過大學四年返兼職的生活,我其實好唔鍾意返shift ,諗住畢左業,應該唔使喇掛,冥冥之中世事就是這麼奇妙。
現在回想起,雖然第一份工作並不如當初如期般返朝九晚五/六,但係好開心,有班好同事好開心,一齊清to-do list好開心。而且個陣好堅持咁朝朝都五點起身做運動再返工,成功瘦返一排宜家又⋯⋯同志仍須努力。

因為辭左第一份工,順理成章係雪梨過左個幾月天堂般的生活,日日吃喝玩樂煮飯做家務。半年唔見真係唔多掂當,見面個刻竟然覺得awkward,明明都已經日日傾計video chat架喇,見到真人個刻感覺好難形容,熟悉又有點陌生的感覺。To-eat list上的餐廳基本上差不多全都去了,緊係要留返少少下次去,食左無數咁多間gelato;跟住又去左第一次camping,被蚊叮了無限啖,太陽曬到個人燶晒,總算見識到wedding cake rock;第一次搬屋,本來諗住好容易,將所有東西放在一起就好了,誰不知多野到通了一個頂。107露比街充滿了回憶,成功/唔成功整左好多野食,例如焗豬扒飯,芒果糯米磁,紫薯湯圓,carbonara,egg benedict等等等等。

42日後,我們又在香港見面,到底當初是怎樣忍受了半年的,long distance真的讓人好難過,不過同時讓人更珍惜在一起的時間。返到黎香港,走唔甩日日飲茶啦,說了好久的飲茶,等了好久的燒賣,都不知吃了多少籠(肚皮上的肉就是這樣來的)。回到了當時讓我們相遇的中學,雖然忘了是在哪個課室上課,卻互相細說中學二三事,有些事情,彷彿沒有交集卻又暗暗埋下種子。食了中學時愛吃的乳酪雪糕,一起走過了當年每天都會走的源禾路同瀝源天橋,彼此訴說著那幾年的中學時光,好懷念啊,那懵懵懂懂的青春歲月。 然後暴走首爾四日四夜,玩得盡興就回來開始上班。

第二份工可以稱為絕世筍工,返一至五,朝九晚六,唔使加班,一年25日大假,仲有公司好大,pantry好_大。不過做既野好唔同好單一,冇乜用武之地,有少少白過日子的感覺,說到底還是想做和文字有關的工作。第一次同好多鬼佬做同事, 係另一種體驗,順便俾啲機會我講下英文,再唔講啊,我驚遲啲會唔識講,同埋工作好自由,做到野就得,身邊啲同事平均一個鐘就會落樓下透透氣(完全傻眼,也太輕鬆了吧)。

返左兩個月,是時候轉下環境喇。冇錯,要去澳洲喇要去澳洲喇我又要去澳洲喇。可能大家已經習以為常(其實我都係去左兩次姐),唔覺得有乜咁出奇,但我今次過去係working holiday喔,唔係去旅行啊。WH為名,同菲安西生活為實,實在受不了long distance了,所以決定搬去佢生活的城市生活。

黎緊既生活會係點,唔知架,又期待又興奮又緊張,未諗做乜,可能連交租都成問題,可能一星期忙足七日,不過路係我揀既,_ _唔好喊。希望生活上軌道之後,有時間寫下文寫下澳洲既生活咁喇。有啲朋友說見未見,真的沒有時間了,在此說聲不好意思,還在頭痛點將所有野塞晒入個gip度,而又不會超重。倒數36小時,好期待好興奮好緊張。

IMG_8670

Looking forward to the adventures ahead!

2016春遊首爾

我曾經說過,每年要去一個從未去過的地方旅行;我曾經以為,這是我一個人的事,我曾經幻想,這會變成兩個人的事。
呵呵,這已經變成了兩個人的事,是我和他的事,是我們的事。
2015年,我們去了紐西蘭南島,他去過,我未去過。
2016年,我們去了韓國首爾,我去過,他未去過。

繼續貫徹窮遊風格,往首爾出發。
帶著兩張廉航機票,背著一個背包一個小行李箱,寄倉行李也沒有買就起行了。

2016年4月23日,星期六,21:50開始。
坐夜機/凌晨機好累人,尤其對於在飛機上睡不著覺的人來說,是種折磨。
不過平機票喎,邊有得你揀,一係買貴啲坐好啲,如果唔係咪買平啲坐得冇咁好囉,況且現在都捱唔到老左點算喎。
如果可以,我想去不用坐飛機的旅行。
嘩,冇寄倉行李好爽,過完關就走得,剛剛好趕上03:20那趟機場巴士。
好快,不用一小時就到左Seoul Station,深夜的首爾帶一絲絲涼意,步行到附近的Siloam汗蒸幕。
在汗蒸幕寄宿一宵已變成不少香港人坐凌晨機的活動,這大概是每個看過韓劇的人都會幻想的事吧。
我地兩個都第一次去傻下傻下唔知要點做,在此happy share要點做:
咁就緊係要俾錢先啦哈哈。分兩個不同時段,05:00-20:00係平啲,20:00-05:00就會貴幾千韓圜。呢個時候,佢會俾套衫你,感覺都算幾乾淨。
之後男女各自入更衣室,入到去除鞋放入locker,拎條鎖匙俾個阿豬媽/阿扎思,佢就會俾個放衫既locker匙你,如果有行李箱的話也不用擔心,另外會有個大locker俾你。
今次去的Siloam有五層,每層都有不同主題不同溫度的汗蒸幕,其實都只不過係訓係啲石上面,但係都幾過癮既。
一樓亦有飯堂,24小時開放,價錢中等,野食都幾好味,份量也不會太少,推介/必飲甜米露(♥♥眼)。

去左弘大,上一次來弘大還未算是旅遊熱點,但現在愈來愈多人會去弘大逛街了。
我們的目的卻比較特別 — 剪頭髮 ^_^
綱上看到人說在首爾理個髮好抵,百零蚊,仲有野飲添。
我地今次去個間叫Bay by HeoSeulGi,橙色既招牌外貌好搶眼。
入到去就好好招呼,坐低飲下野先,有咖啡,有罐裝飲品,任君選擇。
嘩,有兩個人幫手吹頭,頓時有種大少大小姐的感覺。
剪頭髮剪得好細心,可能係因為我要one-length,髮型師左對右對,務求剪到齊晒。
至於溝通嘛,好簡單好簡單的英文還是可以的,不過最好就揾定張相,等佢地知你大概想要咩髮型,咁剪完先唔會喊咁口。
剪完又會幫你吹個靚頭,想好似韓妹咁外耗內捲一樣得,男既就會幫你gel個韓仔頭。
地址:독막로 19길 42-3 1층, Seo gang dong, Mapo-gu, Seoul, South Korea

北村韓屋村/景福宮
Some touristy thing, some historical thing.
韓屋村,再也不是古代的韓屋了,全都翻新過了。
那木門,那石牆,那屋簷,那庭院,那風景,我和他。
感覺不應該推廣作景點,畢竟仍然有人住在部分韓屋,旅客始終會打擾到當地居民。
地方很大,隨便走走,靜靜留影,太陽很曬,雙腳已跛。
有時候,很多時候,我會想,旅遊業與當地人生活之間的平衡。到底,這兩者之間是否只能取其一?好矛盾,如果我是旅人,我會想看到更多風景,想感受當地風土人情;如果我是市民,我只想如常地生活,不希望受到一絲打擾。去旅行時,如何才能不影響當地人民生活,不影響當地文化,是一大旅行學問。
至於景福宮,比起北京故宮,差得遠了。一大片空地,走到最入,還叫有啲野睇,一個好似後花園的地方,好大個池塘,不過也就這樣而已,沒啥特別的。可去可不去,自己決定啦。

江南
漢江以南,只是相隔一條漢江,已經看得出分別了。
江南是有錢人區,街上極少攤檔,幾乎是沒有;一路上可以看得好多整形醫院,真是多得誇張;而且隨處可見外國車如Audi、寶馬,而非韓國車如Hyundai或KIA。人也不多,比起旅客聚腳點如明洞,這裡多了一份謐靜。
今次去江南的目的是要和他的中學好友敍敍舊,沒甚麼景點,純粹走走,看看不一樣的首爾。
我們去了一家酒屋,因為大家也不是太餓,就隨便點了個蒸豬肉來送酒。
點的是傳統米酒Makgeolli,春、夏、秋、冬四款是根據不同酒精濃度來分的,由春到冬,由淡到濃。為何最淡就名為春,最濃就名為冬呢?好似係因為春天發酵期最短,而冬天發酵期最長,好似係咁。
有點像燒肉的吃法,夾一片豬肉,點啲醬,再用塊生菜包住黎食,yummy yummy。


三人都喝得興起,乾了兩大jar Makgeolli,韓國人杯酒通常唔會自己斟,朋友之間會幫對方斟,後輩就幫長輩斟,女仔就擰開少少飲。
韓仔仲教我地心心手勢,右邊有種詭異的搞笑感覺。

夜幕落下,微醺的走在江南街頭,緊係要去便利店買啲醒腦提神飲品喇。
咪睇佢細細支,都幾貴架,有分男仔同女仔,但味道其實分別不大。
暗暗幻想左好耐既浪漫情節又出現喇,有乜溫暖得過兩個人圍著一條頸巾啊。

Auntie Anne’s
必食﹗﹗﹗雖然唔係韓國野,雖然係美國佬野,但係佢地既pretzel好好味,好味到要尖叫。
以前香港也有的,以前我和好友經常去食,可是有一天它在香港絕跡了……
在韓國特登去食,瘋狂去食,數數手指,幾日食左三次,好滿足。
除左pretzel(sweet almond超好食),仲有pretzel dog(Mr. Chung非常nike),佢既自家制lemonade亦是一流。
可唔可以返黎香港開鋪啊?或者係Sydney開都得架……總結是,其實我真係好鍾意食Auntie Anne’s。

八色烤肉

最後一日,最後一頓晚飯,當然要食啲正野喇。八色烤肉之所以咁出名,係因為呢度有八種唔同醃料醃過的五花肉,包括人蔘、紅酒、松葉、大蒜、香草、咖哩、大醬和辣椒醬。由人蔘開始食,最後係辣椒醬,店員會幫你燒埋剪埋架喇,仲有啲配菜如泡菜芽菜等等,而包住肉食既菜都有幾種,仲要係任添的。我地叫左個600g餐,仲有個少啲既400g,其實夠架喇,我呢啲健康L是舉手舉腳贊成食七成飽既﹗好 抵 食 ,食到肚皮撐開都係二百零蚊港紙咋。總店在新村,去開弘大、梨大既都可以去試下架。

來過韓國的人應該都知道,用T-Money(即係八達通)搭地鐵無論搭幾多個站,都係咁多錢架,我地為左省那小小的看似微不足道的車馬費,行左好多好多路,晚晚都嗌晒救命,不過都可以當係消耗下行到邊食到邊既卡路里既。

在下榻的酒店附近發現了我們的食堂﹒—kimbap天國,原來係連鎖既,賣的是一般韓式食物,kimbap,bibimbap,湯啊飯啊咁,正常價位,好多local大叔去食架。

2016年4月27日,星期三,12:55結束。原定是這樣的,不過大頭蝦又淡定的我們錯失了check-in時間,最後憑著手上剩餘的少少錢,在仁川機場流連了一整天,就黎行晒成個機場咁濟,直到晚上坐飛機返香港。

十個月,四個地方,不知道我們的下一站會是哪裡呢?

Sydney美食一籮籮

香港是我從小長大的家,很快澳洲也會變成我的第二個家。
香港有香港的美食,我諗我會好掛住魚蛋燒賣同腸粉、雞蛋仔格仔餅、雲吞麵、譚仔、仲有乜乜乜啦。澳洲有乜食,其實都有好多正野食。
Mr. Chung見我千里迢迢去到澳洲,緊係要去食下正野喇,食完緊係要分享下喇。以後大家去Sydney如果唔去試下,就走寶架喇。

Madang

韓食啊韓食(瞬間心心眼),澳洲有好多韓國人,韓國餐廳主要集中係Strathfield,而呢間就位於市中心喇,不過係條小小的巷子裏,對於第一次去既人黎講可能會少少難揾,但食好西的心誰也擋不住的﹗除左有得食韓燒,又有shabu shabu,仲有各式各樣既韓食,bibim bap、冷麵、石頭鍋湯撈碗白飯,同埋小食,泡菜或者海鮮煎餅,抑或想食炸雞呢。

野食好好食,而且份量也好慷慨,大份又正宗過好多香港既韓國餐廳先,唔知大家有冇發覺,尖沙咀條韓國街好多餐廳都唔係韓國人主理,係呢度聽到啲人用韓文溝通感覺係正宗啲既。環境氣氛也好適合和朋友聚會,不會太静,我討厭那些靜到可以聽到自己呼吸的地方,主要是本人太嘈了,但也不喜歡那些吵到像在clubbing般,聊天要叫到聲嘶力竭,聊完喉嚨好像要爛掉似的。

Zomato連結:Sydney Madang

Cre Asion

這一家小小的café位於市中心,在instagram上看到好多人都會去那兒吃綠茶,好大一杯green tea latte,忌廉十足的green tea roll,還有好多好多,看得我心癢癢也想瘋狂吃一頓,不過奇怪的是上網找它的menu時只有各種綠茶飲料,蛋糕啊心太軟啊都沒有在menu上。而且應該是日本人開的吧,那天去的時候也看到幾桌日本人,質素有保證吧,不會讓人失望吧。

我們是星期六下午去的,人好多,首先是要自己找位子的,店內只有兩三張枱,店外則有七八張吧。找位子後,排隊的人也排到店外(不要被嚇跑了,主要是因為店真的是好小),沒寫在menu上的食物都出現在玻璃櫃裏了,看得人眼花撩亂,每樣都想點來吃。最後點到滿桌綠色,抹茶卷蛋啦,抹茶心太軟(迷你size更讓人覺得少食多滋味呢), 抹茶牛奶好大一碗(杯已經不足以形容了,真的是巨人級的)。值得一提的是,價格一點兒也不貴,可以說是出乎意外呢,平均每樣東西都是AUD5-6左右。環境方面嘛,我們本來坐外面,不過地面是傾斜的,坐的沒有太舒服,之後人變少了就坐進店內,挺喜歡這小店的。


Zomato連結:Cre Asion

The Grounds of Alexandria

最近人氣爆登的一家餐廳,位於工業重鎮Alexandria,出名的原因大概是因為它們的咖啡吧。這裏其實是有兩邊,一邊是The Café,另一邊是The Potting Shed,而我們去的是前者。想先說說環境,給我的感覺有點像香港的工廈,不同的只是明顯這邊明顯更寬敞、更愜意。除了餐廳,外面還有幾檔food carts賣自家製的食物/飲料,還有一個花園,如果café人太多,拿著takeaway到花園也是不錯的選擇。讓我看傻眼的是這裏還有個小農場,養著一頭豬和兩隻外貌奇醜的雞,不知道是真的宰了煮來吃還是只是讓我們這些城市人看看而已?

食物嘛,Mr. Chung之前已經來過一次,讚不絕口,這次他仍舊點了人氣The Grounds Burger,好厚的beef patty,而且好多汁好好味,唔怪得個個都叫喇。而我就意外地點了roasted salmon,認識我的人都知道我不好三文魚,當人人為三文魚瘋狂時,我真是摸不著頭腦啊。不過﹗呢度既三文魚係超級好食啊﹗真的不是開玩笑,入 口 即 融 ﹗下次再來的話,如果唔想試新野,一定會encore﹗雖然我不懂咖啡,還非常推薦給所有coffee-lover,除了有一般的咖啡,還有滿特別的filter coffee,而且有好幾種可供選擇。

Zomato連結:The Grounds of Alexandria

Gumshara Ramen

有想過在唐人街會吃到如此美味的拉麵嗎?只能說一句卧虎藏龍啊。這家拉麵店在一個感覺兜踎的food court裏默默地為大家提供濃厚的豬骨湯拉麵,首先遊客是不會慬得也不會去food court而且用餐吧(我猜),是只有在Sydney生活了不短日子的人才會知道的秘密天堂喔(有種找對了人的感覺^_^)。豬骨湯是每天新鮮熬出來的,完全不加味精,而豬骨湯早上下午各熬一次,賣光了就沒有咯。去Gumshara吃的不是拉麵,也不是甚麼,就是吃它那濃濃的豬骨湯,真的會讓人忍不住把整碗湯喝清光的呢。價錢嘛,也算親民,並沒有調高黎賣,有時候我會想,到底香港點解狗屎垃圾都要咁貴,當然我也知道租金佔了成本好大一部分,但俾得咁既價錢,都俾返啲質素我啊係咪先。講返正題先,一碗拉麵也只是AUD11-13左右,相信我真是超級值得的,記得要揀thick soup啊﹗如果你自問又大食又是食肉獸的話,可以選擇super mega ramen,薄薄的叉燒鋪滿碗邊,仲有好_大條pork ribs,食過番尋味啊。

Zomato連結:Gumshara ramen

Harry’s CAFE  de WHEELS

在Sydney有不少分店的Harry’s最出名的是pie和hot dog,別睇少也別以為這兩樣只是簡單又隨處可見的食物,會有幾特別,會有幾讓人流連忘返。我本來都係咁諗,但其實大錯特錯了,真係好特別好好味。原因是他們加了mushy peas(即係青豆蓉啊,好似薯蓉咁),個人認為必食的是Harry’s tiger pie,絕對是鎮店之寶,那大大pat的mushy peas和mash,仲有淋係面既gravy,不得了啊啊啊。

總店在Wooloomooloo,以caravan形式進行,有別於一般餐廳,你以為會有位坐啊?冇架,兩側有長枱,好似bar枱咁,企係度食,又或者係附近睇下有冇啲地方有得坐係度食。我們去的是總店,位於Wooloomooloo Bay,晚上對住個海港吹住風食都幾正幾舒服架。如果冇乜所謂的話,Bondi beach或者唐人街Haymarket個度都有分店架,包你食完心心眼。

Zomato連結:Harry’s CAFE de WHEELS (Wooloomooloo)

Ciccone & Sons

無意中在instagram上發現的gelato店,見到有green tea flavour即刻狗衝喇,唔係唔試啊嘛。它位於Redfern,是一家很小的店,只有四、五張桌子,沒甚麼裝修可言,而且也挺開放的,可以看到他們整gelato的地方。Gelato是每天製造的,口味也是按他們心情而定(開玩笑的啦,應該是按他們買到的材料:P),他們會把當天的口味寫在長長的紙上,賣完了就會刪去。超喜歡他們的menu的,好有個性,也很有玩味。還好那天有green tea,味道非常適中,如果太多綠茶會變得苦澀,太多奶則會蓋過綠茶味,還有些回甘,絕對可以滿足我對綠茶的慾望。另外,黑芝麻味也值得一讚,吃入口就可以食到濃濃的芝麻香味,就看你幸不幸運吃不吃到了。

Zomato連結:Ciccone & Sons

Hakiki

Newtown的Enmore road多的是食店,有米芝蓮星級的gelato店cow and the moon,而這裡食的是turkish ice-cream,比gelato更黏,口味亦不時轉換,喜歡這種口感,也較gelato少了份奶味,有時食得太多gelato,就會想來這邊食下土耳其雪糕。仲有好特別的Turkish coffee,ummm有些東西試過一次就夠了,因為是超級苦澀,一般也不會加糖的,不過旁邊會放上一粒土耳其糖,為你苦澀的嘴頓時添上一份甜味。至於環境呢,也是很舒服的,喜歡他們深棕色的木枱,而店內外都可以坐,兩種不同感覺,隨你喜歡。

IMG_4249

Zomato連結:Hakiki

Zomato其實等於香港的openrice,但比openrice更勝之處的是餐牌都是一目了然,看清楚食物,看清楚價錢,覺得合適了再去,透明度夠晒高,非常欣賞。

肥妹咪就係咁變成架咋嘛,有個愛吃又放縱自己的未婚夫應該註定會變肉肉女,不過不過,我要重投運動的懷抱了,好掛住爆汗的感覺。女生,任何時候都要學會愛自己,才能愛別人。

共勉之

chiara-sign